Претставниците го изгласаа новиот Закон за потрошувачи со европско знаменце, а кој се потпира на европските практики. Законот предвидува многу унапредени права на потрошувачите, а меѓу нив е тоа дека производите што не одговараат може да се заменат во рок од 15 дена.

„Трговецот има обврска на барање на потрошувачот кој кај него има купено стока, а што не е соодветна во однос на формата, големината, моделот, бојата, бројот или од други причини, неа да ја замени со стока што има соодветен квалитет, освен во случај на стока изработена по нарачка од потрошувачот“, пишува во Законот.

Посебни одредби има и за трговецот во однос на рекламирање на производите и запазување на роковите за употреба.

Повидливи треба да се направат и намалувањата на цените, но и да се спречат манипулации, па секогаш треба да ја има и старата и новата цена. Употребата на зборовите „распродажба“ може да се користат само во следните случаи: престанување на работењето на трговецот; престанување на работењето на трговецот во неговите дотогашни деловни простории; престанување на ставањето во промет на одредени стоки или услуги од предметот на работење на трговецот или при вршење сложени градежни зафати во или на деловните простории на трговецот.