Холивудскиот актер Леонардо Дикаприо е познат по долгата историја на еколошки активизам, а сега има нов вид змија именувана во негова чест, пишува „Њујорк пост“.

Истражувачите првпат го откриле овој рептил во западните Хималаи во текот на летото 2020 година, повикувајќи се на „тематска студија“ објавена на „Нејчр“ во втората половина на октомври.

Откако фатиле неколку змии со бакарна боја со десетици заби, научниците ја анализирале нивната ДНК. Тие открија дека иако змијата има познати карактеристики на другите змии, таа е сосема нов вид – Anguiculus dicaprioi, или хималајската змија на Дикаприо.

Хималајските змии на Дикаприо се сметаат за мали, достигнувајќи должина од само 56 сантиметри. Имаат кратки глави, големи ноздри, многу заби и стрмно заоблена муцка.

Покрај тоа, новиот вид може да се препознае по бледо сива лента, која речиси наликува на јака околу вратот на рептилот.

Змијата го добила името по холивудскиот актер, бидејќи „американскиот актер, филмски продуцент и активист за заштита на животната средина е некој кој е активно вклучен во подигање на свеста за глобалните климатски промени и загубата на биолошката разновидност“, велат истражувачите.

Видот бил пронајден како се „сонча“ на планинските патишта и „останал неподвижен додека не бил фатен, без да се обидува да касне“.

Тимот, во кој беа Зеешан Мирза, Вирендер Бардвај, Саунак Пал, Х.Т. Ларемсанга, Гернот Фогел, Патрик Кембел и Харшил Пател, изјави дека хималајските змии на Дикаприо можат да преживеат на надморска височина од околу 1.850 метри.

Според објавените наоди, новиот вид е откриен во Непал и во соседните индиски држави.