Осомничениот маж приведен од Тајната служба, вооружен со пушка го чекал Доналд Трамп да му се приближи на теренот за голф во Вест Палм Бич, изјавил за Си-ен-ен анонимен извор запознаен со првичната истрага за инцидентот што се случи денеска попладне.

Федералната служба за безбедност објави дека го третира инцидентот како „спречен обид за атентат“.

Трамп, кој играл голф во својот клуб, бил меѓу терените 5 и 6, заедно со донаторот Стив Виткоф, додека осомничениот бил неколку терени понатаму и чекал да му се приближи целта. Трамп бил придружуван од неколкумина агенти од Тајната служба.

Еден од нив „забележал цевка од пушка во оградата“, по што бил отворен оган кон осомничениот „како превентивна мерка“, изјавил изворот на Си-ен-ен.

Сведоци забележале како вооружен маж се појавува од грмушките кај теренот и бега кон возило.

Повеќе извори објавија дека имало неколку истрели, но од надлежните служби се очекува да прецизираат дали било стрелано кон Трамп или кон неговиот потенцијален напаѓач, односно дали имало престрелка помеѓу осомничениот и припадниците на службите за безбедност.

Трамп итно бил префрлен на безбедно, додека целиот клуб и терените биле затворени. Неговиот живот, според неофицијалните информации, не бил директно загрозен.

Канцеларијата на окружниот шериф објави дека едно сомнително лице било приведено, а било запленето и оружје со долга цевка, кои анонимни извори го опишале како „слично на калашников“.

Два часа по инцидентот Трамп објави дека се чувствува „добро и безбедно“. Претседателот Џо Бајден редовно е брифиран за текот на истрагата, како и потпретседателката Камала Харис, која објави дека ѝ е мило што нејзиниот републикански противкандидат не е загрозен.

Пред три месеци Трамп беше цел на атентат на предизборен митинг во Пенсилванија. На 13 јули во него од пушка со дурбин пукаше Томас Метју Крукс. Тој од позиција на покрив на објект, недалеку од бината на собирот, испукал осум куршуми, од кои еден заврши во увото на Трамп, а друг смртно рани учесник на предизборниот митинг. Уште две лица беа ранети пред Крукс да биде застрелан и убиен од снајперист од обезбедувањето.

Тајната служба презеде одговорност за инцидентот, бидејќи не го обезбедила кругот околу настанот и не реагирала итно на предупредувањата од луѓе што го забележале сомнителниот човек со пушка на покривот на соседниот објект.