Неколку граѓани на Норвешка мислеле дека станале милионери откако добиле известување од државната компанија за игри на среќа во кое се велело дека освоиле неверојатни суми – сè додека не се покажало дека се работи за грешка. „Норск Типинг“ имала грешка при конверзијата од евро центи во норвешки круни, што предизвикало износите да станат високи.

„Неколку илјади луѓе кои освоија награди на Евроџекпот беа информирани за неточни износи во петокот“, рече Норск Типинг, одбивајќи да го потврди точниот број на луѓе.

Извршната директорка на „Норск Типинг“, Тоње Сагстуен, се извини и поднесе оставка еден ден подоцна. „Грешка во конверзијата од евро центи во норвешки круни предизвика износите на наградите да бидат премногу високи“, додаде компанијата во соопштението. Износот се множи со 100, наместо да се дели со 100, бидејќи „Норск Типинг“ добива износи на награди од Германија во евра, а потоа ги конвертира во норвешки круни.

Точните износи беа ажурирани во саботата навечер и не беа извршени неточни плаќања.

„Многу ми е жал што разочаравме толку многу луѓе и разбирам дека луѓето ни се лутат“, рече компанијата, додавајќи дека критиката е оправдана.

Министерката за култура и еднаквост, Лубна Џафери изјави за НРК дека „такви грешки не треба да се случуваат“, особено затоа што „Норск Типинг“ има ексклузивно право да обезбедува услуги за игри во земјата.

„Очекуваме одборот активно да работи на подобрување на контролните рутини“, рече таа.

Ова не е прв пат „Норск Типинг“ да биде критикуван. Компанијата соопшти дека открила неколку сериозни грешки во последните месеци и дека се соочила со голем број технички проблеми во текот на изминатата година.