Норвешкиот антидискриминациски трибунал одлучил дека политиката на француската национална авиокомпанија „Ер Франс“ според која на мажите не им се дозволува да седат покрај деца кои патуваат без придружба од возрасни луѓе, е дискриминаторска. Ова денеска го соопшти патник кој поднел претставка до независното тело, Дискримерингснемда.

Екипажот на „Ер Франс“ на летот од Осло до Париз во октомври 2022 година побарал од маж да ги смени седиштата со жена бидејќи неговото место било покрај две деца кои патувале сами. Патникот Доминик Селиер го пријавил тоа во норвешкиот антидискриминаторско тело, пренесува „Франс прес“.

Адвокатот на „Ер Франс“ за време на сослушувањето тврдел дека персоналот само ги следел правилата на компанијата, кои биле воведени затоа што мажите сочинувале 97,93 отсто од сексуалните злоставувачи.

„Тоа не беше пријатна ситуација. „Патниците околу мене ме гледаа, ме чекаа да се сменам за да полетаме. Можеби дел од тоа беше моја проекција, но некои од погледите ги толкував како „овој тип е сомнителен“, изјави Селиер за „Франс прес“ во вторникот.

Според пресудата на норвешкото тело од крајот на минатата година, во која АФП имала увид, политиката на „Ер Франс“ предвидува дека ако летот е целосно резервиран, „по можност“ покрај децата кои патуваат без придружба треба да седат жени.

Дел од аргументите на правниот тим на „Ер Франс“ пред трибуналот било и тоа дека различниот третман на мажите и жените е оправдан со „потребата да се заштитат малолетниците без придружба од ризикот од трговија со луѓе и други форми на насилство и агресија“.