Два автомобили се запалиле ноќеска, едниот на паркингот кај Клиниката за гинекологија во Чаир и во село Батинци, каде пожарот се проширил на семејна куќа па во болница завршиле сопружници и нивните деца.

Едниот пожар бил пријавен нешто пред три часот по полноќ кога се запалило возило „ауди“ со скопски регистерски таблици сопственост на триесет и седумгодишен скопјанец.

Повредени лица нема, а пожарот бил изгаснат од граѓани кои се затекнале на местото.

Другиот пожар бил пријавен неколку минути пред 4 часот исто така во СВР Скопје. Пожарот настанал во возило „БМВ“ кое било паркирано во гаража во куќа.

-Од пожарот бил зафатен и еден кат од куќата, а поради вдишување чад А.М., неговата сопруга Љ.М. и нивните две малолетни деца биле пренесени во Комплекс клиники „Мајка Тереза“ за укажување лекарска помош. Екипа од Бригадата за противпожарна заштита Скопје го изгаснала пожарот – соопшти МВР.