По излегувањето на Мендух Тачи и на Демократската партија на Албанците (ДПА) од опозицискиот Европски фронт, главното прашање во јавноста е дали Фронтот ќе остане обединет или, како што најавува владејачката Вреди, потегот на лидерот на ДПА ќе биде само почеток на распадот на предизборната коалиција, предводена од лидерот на ДУИ Али Ахмети. Тачи потврди дека го раскинува партнерството, но и дека ќе биде во редовна комуникација и консултации со Ахмети.

Излегувањето на Тачи од Фронтот речиси и не изненади ниту еден од довчерашните партнери во коалицијата, кои потегот на лидерот на ДПА го коментираат како очекуван и потег за внимание во јавноста. Тој досега не го информирал претседателот на Собранието Африм Гаши како ќе дејствува во парламентот.

– Сто дена се малку за да се анализира работата на една влада. Причината зошто отсуствував на прес-конференцијата за стоте дена за владеењето на Владата, организирана од „Европскиот фронт“, е поради тоа што јас и ДПА веќе нема да бидеме дел од Фронтот – рече Тачи во гостувањето на „Клан Македонија“.

Тој останува на позициите на Фронтот – дека ДУИ ја поразила коалицијата „Вреди“ во секоја смисла и оти нема сомнеж дека ДУИ е политичка сила во земјата.

– ДУИ има бројки, има пратеници. ДУИ го победи Вреди по бројност, по пратеници, по сè. Никој не може да ме убеди дека Вреди е посилна од ДУИ. ДУИ може дури и да наметне некакво дејство за уставните амандмани, затоа што мислам дека имаат капацитет и можат да изберат форма – вели Тачи.

Тој смета дека на последните парламентарни избори само ДУИ и ДПА биле заслужни за резултатот и дека другите партнери речиси не придонеле ништо, иако според бројот на пратеници факт е дека Алијанса, предводена од Зијадин Села, има четири пратеника, а ДПА го има само Тачи за пратеник, исто како и „Движењето попули“ на Скендер Реџепи, и двата турски партнера – Демократската партија на Турците на Бејџан Иљас и движењето на Сали Мурат.

Ова е второ „ситнење“ на Европскиот фронт, откако претходно, по прегласувањето на изборите во Шестата изборна единица, Фронтот првично од 19 спадна на 18, сега се сведе на 17 пратеника.

За Арта Биљали Зендели од ДУИ, јасни се ставовите на Тачи дека тој ќе дејствува опозициски.

– Ќе дејствува опозициски. Тачи самиот кажа и беше доволно јасен да се увиди и да се стекне впечаток дека тој ќе продолжи да дејствува како опозиција и дека ќе одржува редовни консултации со претседателот на ДУИ Али Ахмети – рече Биљали-Зендели, која смета дека Фронтот е единствен.

На прашањето дали ДУИ стравува дека ќе има ново раситнување на Европскиот фронт, како што веќе најавија дел предводници на Вреди, Изет Меџити и Билал Касами – дека излегувањето на ДПА е само почеток на распадот на коалицијата предводена од Ахмети, таа рече дека нејзин впечаток е дека Фронтот е единствен.

– Одговорност за тоа што се случува и што ќе се случи во Европскиот фронт носат лидерите на партиите што го сочинуваат Фронтот, како и самите пратеници, а не тие што однадвор се обидуваат да наметнуваат одредени тези во јавноста. Засега нема да заминат пратеници од Европскиот фронт – вели Биљали-Зендели.

Од комуникацијата на „Слободен печат“ со претставници на Европскиот фронт, впечаток е дека речиси сите го очекувале потегот на Тачи, иако, како што велат, тој не најавил дека ќе замине.

– Тачи го кажа своето. Дваесет години се знае наративот на Тачи – неодговорно и неетичко однесување во политиката. Тој вели дека Турците не донеле гласови на изборите, а ако тој не беше во Европскиот фронт, немаше ни да стане пратеник. Му посакувам среќа до крајот на мандатот, зашто пратеник повторно нема да биде. Ние не размислуваме да го напуштиме Фронтот. Сметам дека во оваа политичка атмосфера ќе биде здраво за политичката сцена да има здрава опозиција – ни изјави Бејџан Иљас од Демократска партија на Турците.

Во Фронтот остануваат и партиите на Скендер Реџепи, Аријанит Хоџа, движењето на Сали Мурат и партијата на Ромите.

Се почувствувал навреден зашто Ахмети „не го игра“

Освен дека потегот на Тачи е очекуван, дел претставници на Европскиот фронт коментираат дека Тачи заминал од Фронтот зашто се почувствувал навреден, бидејќи откако тој бил во тимот на Европскиот фронт за преговори за новата Влада, потоа бил ставен настрана, односно дека не бил информиран за средбата меѓу премиерот Христијан Мицкоски и Али Ахмети. Според ова, потегот на Тачи е порака до Ахмети дека со него не може така да се игра.

Јавноста, пак, памети дека не е првпат Тачи да иницира или да влегува во предизборни коалиции, а набрзо потоа да ги напушта политичките партнери. Така беше со предизборната коалиција помеѓу ДПА и ПДП, тогаш предводена од Абдулади Вејсели, како и предизборната соработка помеѓу Тачи и Руфи Османи. И во двата случаи Тачи ги раскина коалициите.