Бегалецот во Будимпешта и поранешен премиер и претседател на ВМРО-ДПМНЕ, Никола Груевски, се огласи преку Фејсбук откако денеска судот му изрече казна од седум години затвор за предметот „Плацови на Водно“.

„Македонија живее време на политички мотивирани судења против политички неистомисленици на власта, полошо од периодот на 1949 година“, оцени Груевски, повторувајќи ги тезите со кои се претставува како жртва.

„Исто како и тогаш: во име на народот. Една модерна инквизиција во која жртвата пред судењето да почне е веќе осудена и неформално е договорена и висината на казната помеѓу спрегата власт-опозиција-судство. Само политиката има сила да го смени тоа, бидејќи таа го создава. Време во кое судиите за да не си направат личен проблем за себе, во ваквите процеси не судат по закон и со реални докази, туку прифаќаат изјави на уценети сведоци од обвинителството и власта кои се темелат на претпоставки, па така и ги именуваат (самите тие сведоци не кријат дека кажуваат претпоставки) и како тежок преседан се прифаќаат како неспорни докази лажни искази на обвинети на кои во истиот и/или во други предмети кои ги води истиот обвинител им се заканува сериозна казна, па за да се спасат од прогонот подготвени се на се. Тие лица исказите и одбраната ја менуваат од час во час, особено одкако ќе ги стават во притвор кој во Македонија е инструмент за тортура и изнуда на лажни изјави и лажни признанија.ПРЕТПОСТАВКИТЕ именувани како претпоставки од самите уценети сведоци, судиите подоцна ги именуваат со зборот “ФАКТИ”. ЧУВСТВАТА на некој уценет сведок за една или друга работа, за кој самиот сведок вели дека му биле чувство и ништо повеќе, судиите ги именуваат со зборот “ДОКАЗ”, независно што самиот сведок ги именува како чувства“, пишува Груевски.

Според него, пресудите и висината на казните се одредени уште пред да почне судењето.

„Се другото е “театар” за јавност, односно време на пропаганда кога и јавноста треба да се убеди, што завршува со долг политички говор и некаква психолошка анализа на судијата, бидејќи за правна нема реални аргументи“, пишува поранешниот премиер, кој тајно избега во Унгарија за да не се соочи со правдата во родната земја.

„Власта преку правосудниот систем прави што сака, кому сака нешто запленува и во колкава сака вредност независно од се, кому сака не запленува, зависно од близината со неа. Нема критична маса меѓу стручната елита која е спремна да постави логични прашања колку и да гледа беззаконие и апсурдни процеси. Но, ништо не е вечно… Ќе дојде добро време“, вели меѓу другото тој во опширното излагање.