Актерот Николас Кејџ раскажа за тешкиот период кога морал да прифати „лоши“ филмски улоги за да се ослободи од долгови. Како гостин во „60 минути“ на „Си-би-ес“, Кејџ се наврати на финансиските тешкотии по падот на пазарот на домување.

„Премногу вложив во недвижнини, падна пазарот, а не се повлеков на време. Им вратив се на даночниците, околу шест милиони долари“, објасни 59-годишниот оскаровец.

„Тоа беше мрачен период, но многу ми помогнаа улогите во филмовите. Работата отсекогаш била мојот ангел чувар. Можеби не секогаш беа успешни улоги, но беше работа“, додаде тој.

За да се извлече од финансиската криза, Кејџ прифатил филмови чии премиери можеле веднаш да се гледаат на телевизија, а не само оние што се популарни и премиерно се прикажуваат во кината. Тој призна дека платата е она што на крајот го натерало да потпише за филмовите.