Поранешниот министер за здравство Никола Тодоров во изјава за „Слободен печат“ вели дека е лага дека самиот искористил дискреционо право и на Тик-ток анестезиологот Валтон Дервиши му признал специјализација без да има потписи од лекарска комисија. Тој вели дека ставил про-форма потпис на признавањето на специјализацијата на доктор Дервиши, откако комисијата од четворица доктори и еден правник дала позитивно мислење дека образованието на Дервиши од Косово е компатибилно со тоа во нашата држава.

Истата информација за „Слободен печат“ ја потврдува и правникот од Министерството за здравство Бесник Бајрами, кој бил член на комисијата што одлучувала за признавање на специјализацијата на доктор Дервиши. „Слободен печат“ имаше увид во документите од целата постапка и од нив е евидентно дека во записникот за признавање на странската специјализација, потпишани се тројца од петмина доктори и како шести член е потпишан правникот Бајрами. Двајца доктори не се потпишани, едниот поради тоа што бил во странство, а другиот од причини непознати за редакцијата.

Правникот Бајрами вели дека затоа што имало мнозинство потписи (три на број), станува збор за комплетно запазена процедура.

Така, на доктор Валтон Дервиши од Тетово, му се признала специјализацијата по анестезиологија и интензивно лекување завршена во Медицинскиот факултет при приштинскиот универзитет во Косово.

Комисијата за призавање на специјализации завршени во странство по дејноста анестезиологија со интензивно лекување  одржала состанок во три наврати и побарала Дервиши да им достави дополнителни документи заради објаснување на фактичката состојба. Не им било јасно како во исто време специјализирал и во Скопје и во Косово и го барале дневникот за работа на доктор Дервиши, во кој се пријавувал дека доаѓа на местото за специјализација во Косово во болницата.

„После доставувањето на потребната документација се утврди дека програмата на специјализацијата по анестезиологија и интензивно лекување во приштинскиот универзитет Република Косово е компатибилна со програмата за специјализација и супспецијализација во Република Македонија“ пишува во решението со кое на доктор Дервиши му се признава специјализацијата што ја завршил во Косово.

Од Министерството за здравство за „Слободен печат“ велат дека Дервиши кон барањето за признавање на специјализацијата ги доставил сите документи битни за реализација на таквото барање.

„Не се точни наводите дека Комисијата тогаш му дала негативно мислење, туку дала задолжување именуваниот доктор да достави дополнителни документи за да се разјасни целата ситуација околу неговото барање за признавање на специјализацијата. Имено, после обезбедувањето на потребната документација од подносителот на барањето, Комисијата на 2 март 2015 донела заклучок дека таа специјализација е компатибилна со специјализацијата во Република Македонија. Согласно тој заклучок, изготвено е решение за признавање на таа специјализација, потпишано од тогашниот министер за здравство“, велат од МЗ во одговорот до редакцијата.