Отфрлањето на шансата за Вилијамс да го замени Логан Сарџент со Мик Шумахер не е изненадување за познавачите работите во Формула 1. Според коментарите, единствениот впечаток што Германецот го оставил кај Ф1 тимовите е „всушност тој не ни треба“.

Ф1 Инсајдер известува дека тимскиот шеф на младиот Шумахер, Тото Волф, му пришол на својот поранешен значаен соработник во Мерцедес, а сега тимски шеф на Вилијамс, Џемс Воулс, за овој да го земе Германецот како возач.

Инаку сезонава Мик е резервен возач на Мерцедес.

Според извештајот, Волф направил се што можел за да го претстави Шумахер прифатлив за својот поранешен соработник, но тој откако ги проучил податоците на Мик од симулаторот на Мерцедес, конечно откажал.

Ф1 Инсајдер не е изненаден бидејќи смета дека Шумахер не оставил одличен впечаток на тимовите во своите настапи за Хаас.

Мик Шумахер, син на легендарниот Михаел Шумахер, освои поени само двапати во своите 44 стартови, а беше и нападнат од неговиот тогашен тимски шеф Гинтер Штајнер поради честите оштетувања на автомоблот што скапо го чинеа тимот.

Мик Шумахер во Формула 1 дојде како шампион од Формула 2 (2020) и од него многу се очекуваше, но засега тој не одговори на очекувањата.