Португалскиот тим Авес ги преживува најтешките мигови во клупската историја, тие одамна математички испаднаа во втората лига, а поради финансиските проблеми играчите си заминуваат како на филмска лента, а почна да им „снемуваат“ и клупски предмети.

Нивното одигрување на последните две кола беше под голем знак прашалник, но се снајдоа за натпреварот против Бенфика на домашен терен иако фудбалерите си заминуваат како на филмска лента.
Но, нивниот натпревар од последното коло кога му гостуваат на Портимоненсе е неизвесен поради бизарен момент.

Управата на клубот не може да им обезбеди превоз на натпреварот бидејќи ги загубила клучевите од автобусот. Тие им порачале на фудбалерите кои се уште не добиле раскин на договорите поради неисплатените плати во последните шест месеци, да патуваат 468 километри во еден правец во сопствена режија.

Како да беше малку оваа бизарна вест, набрзо пристигна уште една која е за рубриката верувале или не, од клубот исчезнал пехарот за победникот на Купот, најголемиот трофеј во клупската историја.

Авес кој најголем дел од историјата ја помина во пониските лиги во Португалија, во 2018 година изненадувачки триумфира во португалскиот Куп откако во финалето го совлада Порто. Пехарот требаше да биде изложен на влезот во клупските простории, но како што пишува весникот „Рекорд“, луѓето од управата се шокирале кога виделе дека пехарот го нема.