Израелскиот премиер Бенјамин Нетанјаху денес изјави дека, по една недела преговори во Доха, високи членови на израелскиот преговарачки тим ќе се вратат во Израел, додека некои претставници ќе останат во Катар.

„По околу една недела интензивни преговори во Доха, високиот преговарачки тим ќе се врати во Израел на консултации, додека претставниците на работно ниво засега ќе останат во Доха“, се вели во соопштението од кабинетот на премиерот.

Во соопштението се додава дека Израел се согласил со американскиот предлог за враќање на заложниците, кој се базира на рамката на американскиот претставник Стив Виткоф за краткорочен прекин на огнот во замена за околу половина од живите заложници што ги држи Хамас во Газа, објавува „Тајмс оф Израел“.