Израелскиот премиер Бенјамин Нетанјаху во вторник во Вашингтон ќе се сретне со американскиот претседател Доналд Трамп, пишува „Тајмс оф Израел“.

Неговиот кабинет претходно објави дека Нетанјаху е првиот странски лидер кој бил поканет во Белата куќа за време на вториот мандат на Трамп.

Официјален претставник на Белата куќа потврди дека средбата ќе се одржи на почетокот на следната недела, но рече дека датумот и времето допрва треба да се финализираат, објави CBS News.

Состанокот доаѓа во време кога во Газа е на сила шестнеделно примирје, откако Израел и Хамас постигнаа договор за прекин на огнот и ослободување на заложниците.

Трамп минатата недела објави дека сака Египет и Јордан да ги прифатат Палестинците од Газа, предлог што го осудија и Хамас и палестинската управа. Јордан и Египет исто така ја отфрлија идејата.

Идејата за охрабрување на жителите на Газа да се преселат во соседните земји одамна ја туркаат тврдокорните десничарски членови на владата на Нетанјаху, наведува „ЦБС њуз“.