Израелскиот премиер Бенјамин Нетанјаху синоќа изјави дека палестинската држава „нема да се случи“ и дека оние земји што ја признаа даваат „огромна награда на тероризмот“.

„Имам јасна порака до оние лидери кои признаваат палестинска држава по ужасниот масакр од 7 октомври – вие давате огромна награда на тероризмот“, рече Нетанјаху во видео изјава, пренесува Јерусалим пост.

Тој нагласи дека одговорот на Израел на новите признавања на Палестина ќе дојде откако ќе се врати од Соединетите Држави следната недела и додаде дека палестинска држава нема да биде основана западно од реката Јордан, објави „Тајмс оф Израел“.

„Одговорот на неодамнешниот обид да ни се наметне терористичка држава во срцето на нашата земја ќе биде даден откако ќе се вратам од Соединетите Држави. Почекајте“, нагласи Нетанјаху.

Израелскиот премиер рече дека под негово водство, Израел ги удвои еврејските населби во Јудеја и Самарија, како што Тел Авив го нарекува окупираниот Западен Брег, и додаде дека ќе продолжи по тој пат.

Обединетото Кралство, Канада и Австралија, а подоцна и Португалија, вчера официјално ја признаа државата Палестина.

Палестина моментално е признаена од околу 75 проценти од 193-те земји-членки на ОН, но нема меѓународно договорени граници, главен град или армија.

Од ноември 2012 година, таа има статус на држава набљудувач, која не е членка на Генералното собрание на Обединетите нации.

За денес во Генералното собрание на ОН е закажана меѓународна конференција на високо ниво за мирно решавање на палестинското прашање и спроведување на решение за две држави.