Израелскиот опозициски лидер Јаир Лапид го извести претседателот на Израел, Ревен Ривлин дека после повеќе преговори конечно постигнал договор со десничарскиот политичар Нафтали Бенет и дека го има потребното мнозинство за формирање на нова израелска влада.

„Господине претседател, чест ми е да ве известам дека формиравме Влада“, се наведува во писмото кое Лапид го испратил до претседателот.

Тој потоа напиша објава на социјалната мрежа Твитер.

„Оваа Влада ќе работи за сите граѓани на Израел, оние кои гласаа за неа, но и оние кои не го направија тоа. Ќе направиме се за да го обединиме израелското општество“.

Според тоа, Нетанјаху конечно ќе биде сменет, после 12 години на власт.

Според договорот, Лапид и Бенет ќе ја поделат работата на премиерот во ротација. Бенет ќе ги отслужува првите две години, додека Лапид треба да ги отслужи последните две години.

Историскиот договор ја вклучува и малата исламистичка партија, Обединетата арапска листа, што ќе ја направи првата арапска партија што некогаш била дел од владината коалиција.