Израелскиот премиер Бенјамин Нетанјаху ја поздрави одлуката на Австралија да го протера амбасадорот на Иран поради антисемитските напади во земјата, нарекувајќи го „прв чекор“ во борбата против антисемитизмот.

„Ова е првиот чекор и се надевам дека нема да биде последен“, рече Нетанјаху на платформата X, додавајќи дека е горд на акцијата на Австралија откако Иран беше поврзан со два антисемитски инциденти во земјата, објави „Тајмс оф Израел“.

Нетанјаху претходно ја критикуваше австралиската влада за нејзиниот „помирувачки став“ кон антисемитизмот, а сега го пофали премиерот на земјата, Ентони Албанезе, за неговиот решителен одговор.
Одлуката на Австралија да го протера амбасадорот на Иран дојде откако беше откриено дека Иран стои зад два пожари подметнати во Австралија во 2024 година, кои беа антисемитски по природа.

Австралија, исто така, ги повлече своите дипломати од Иран и одлучи да ја стави Исламската револуционерна гарда на листата на терористичка организација.

Ова е прв пат Австралија да протера амбасадор од Втората светска војна.

Како што беше објавено вчера, портпаролот на иранското Министерство за надворешни работи, Исмаил Багеџ, ја осуди одлуката на Австралија да го протера иранскиот амбасадор и предупреди дека секоја несоодветна дипломатска акција ќе биде „пресретната со реципрочен одговор“.

„Обвинувањата за антисемитизам се апсолутно неточни, таков концепт нема место во нашата религија. Тоа е концепт измислен од Западњаците и тие самите треба да одговорат пред своето историско минато“, рече тој на прес-конференцијата, пренесува Тасним.

Зборувајќи со новинарите во австралискиот главен град во вторник, Албанезе ги опиша нападите, кои се случија во Сиднеј и Мелбурн минатата година, како „вонредни и опасни акти на агресија оркестрирани од странска нација“ за да се поткопа социјалната кохезија во Австралија.