Авионот на скандинавската авиокомпанија САС, на релација Осло-Малага, морал принудно да слета на данскиот аеродром во Копенхаген поради глушец.

Еден од патници го споделил своето непријатно искуство со новинарската екипа на Норвешката радио-телевизија НРК. Имено, додека летале, жената која седела до него ја отворила кутијата со храна, која претходно ѝ била послужена од стјуардесите, и од неа скокнал глушец.

Патниците потоа преку разглас биле известени дека, иако мало, глувчето е безбедносен ризик и дека на пилотите им било наредено да го свртат авионот, кој веќе бил над Германија, и да слетаат во Копенхаген.

Претставник на САС потврдил дека глушецот бил во авионот и објасник дека кога во авионот ќе се најдат штетници, стандардна процедура е да се спушти авионот и да се изврши проверка.

Патниците од Осло на крајот пристигнале во Малага, Шпанија со околу два и пол часа задоцнување.

Не беше објавено дали добиле други пакети со оброци во Копенхаген.