Оваа жена е единствената личност во светот со најретка крвна група, што ја спречува да прима трансфузии од други, што е огромен проблем.

На целата планета не постои личност чија крв се совпаѓа со една жена (68) од Гвадалупе. Таа засега е единствената позната личност со крвна група наречена „Гвада негативна“ (Gwada negative), според „Лајф саенс“ (Life science).

Називот доаѓа од разговорното име за францускиот карипски остров каде што живее жената.

Научниците од Француската агенција за трансфузија на крв (Etablissement français du sang, скратено EFS), кои ја открија крвната група „Гвада негативна“, ги претставиле своите откритија овој месец на Конгресот на Меѓународното здружение за трансфузија на крв во Милано.

Истражувачкиот тим ја запознал жената во 2001 година, додека таа живеела во Париз и правела рутински крвни тестови во склоп на подготовката за операција.

Лекарите не можеле да ја идентификуваат нејзината крвна група ниту да пронајдат соодветно совпаѓање.

Во тоа време, ДНК анализата не била доволно развиена за детално да се истражи случајот, но во 2019 година, истражувачите ја употребиле најсовремената технологија за да го секвенционираат целиот геном на пациентката.

Препознаена како 48-ма крвна група

Истражувањето открило мутација во генот ПИГЗ (PIGZ), кој влијае на начинот на кој протеините се врзуваат за површината на крвните клетки.

Тимот заклучил дека жената го наследила својот уникатен крвен профил од своите родители, бидејќи двајцата го носеле мутираниот ген.

„Оваа жена е несомнено единствениот познат случај во светот. Таа е единствената личност во светот која е компатибилна самата со себе“, рекол биологот Тиери Пејрар од ЕФС.

Човечката крв е поделена на крвни групи врз основа на присуството или отсуството на одредени маркери (или антигени) на површината на црвените крвни клетки.

АБО системот на крвни групи опишува дали личноста има антиген А, Б, двата или ниту еден. Резус класификацијата одредува дали клетките се „позитивни“ или „негативни“ за Рх факторот.

Системите за крвните групи се клучни за трансфузиите, бидејќи телото ги отфрла крвните антигени кои ги препознава како туѓи.

Истражувањата велат дека оваа крвна група е изложена на најголем ризик од мозочен удар

Луѓето со крвна група АБ имаат антигени А и Б и можат да примаат крв од кој било донор. Спротивно на тоа, крвната група нулта нема антигени, па луѓето со оваа група можат да примаат крв само од други со истата крвна група.

Комбинацијата на АБО и РХ системите дава осум основни крвни групи. Меѓутоа, научниците објаснуваат дека постојат голем број помалку познати крвни групи – од кои 45 во моментот се признати од Меѓународното здружение за трансфузија на крв (ИСБТ). Гвада негативната сега е призната како 48-ма крвна група од ИСБТ.

Луѓето со ретка крв им помагаат на другите

Научниците планираат да истражат дали постојат други луѓе со оваа единствена крвна група. Тие наведуваат дека крвните групи често се поврзуваат со луѓе од слично потекло, па затоа планираат да започнат потрага меѓу донорите на крв во Гвадалупе.

„Откривањето нови крвни групи значи обезбедување подобра грижа за пациентите со ретка крв“, се вели во соопштението за медиумите на ЕФС, пишува „Њујорк пост“.

Во одредени случаи, пациентите со ретка крв можат да им помогнат на другите.

Џејмс Харисон, познат како „човекот со златната рака“, имал крв што содржела ретко антитело познато како Анти-Д, кое се користи за изработување на лекови за трудници со Резус болест.

Резус (Rhesus) болеста (хемолитичка болест на новороденчето) не е опасна за мајката, но предизвикува нејзините антитела да ги уништуваат крвните клетки на нејзиното бебе, што може да биде фатално.

Од откривањето на антителото Анти-Д во 1960-тите, тоа спасило милиони животи, а трудниците во целиот свет се потпираат на добрината на малата група луѓе кои би можеле да го донираат тоа антитело, пишува „Њујорк пост“.