Данска доживува невообичаено голем бран на грип кој се чини дека е поврзан со музички фестивал.

Според податоците од Институтот Статенс Серум (ССИ) во Данска, помеѓу 11 и 17 август се пријавени 115 случаи на грип, што е значително зголемување во споредба со 19-те случаи регистрирани една недела претходно, пренесува Еуроњуз.

Агенцијата ги следи случаите на грип во текот на целата година веќе 15 години и вели дека ова е првпат да идентификува голем број случаи во август.

„Времето е многу невообичаено“, рече Рамона Требјен, раководител на секторот во SSI.

Во Данска, грипот обично предизвикува повеќе инфекции во текот на зимските месеци, кога луѓето се собираат во затворени простории и вирусот има повеќе можности за ширење.

Се чини дека епидемијата на грип е поврзана со „Смукфест“, музички фестивал што се одржа во градот Скандерборг претходно овој месец. Во текот на една недела, фестивалот собра речиси 60.000 посетители.

Според податоците од Институтот ССИ, сите болни посетители на фестивалот имале идентична форма на грип тип А H1N1, познат и како свински грип, додека инфекциите на другите луѓе доаѓале од различни извори.