Владата нема намера да ја зголеми старосната граница за заминување во пензија, ниту да ги зголемуваат давачките, како што предложија Фискалниот совет и Светска банка, вели премиерот Христијан Мицкоски. Фокусот, според него, ќе биде на политики за намалување на сивата економија, намалување на даночната евазија со цел да се соберат повеќе пари во буџетот.

– Апсолутно останувам на ставот, тука не треба никој да има никаква дилема. Тоа треба сите да бидат сигурни дека ние политиките не ги менуваме инстант. Имаме аргументи, се разбира, не сме инаетливи па да речеме не може така кажавме, туку имаме аргументи. Најлесно е да се направи ова кое што е препорака на Фискалниот совет и дел од експертите на Светска банка дека треба да се зголеми данокот на додадена вредност, придонесите за здравствено и пензиско, да се зголеми старосната граница и слично – изјави Мицкоски во интервју за МИА.

Тој вели дека се фокусираат на политики коишто ќе значат намалување на сивата економија, намалување на даночната евазија и повеќе пари во буџетот.

– Најлесно е да удриме на грбот на граѓаните. Тоа нема никогаш да го направиме ако не ги исцрпиме сите можности коишто ги црпиме затоа што оваа Влада е избрана со огромна доверба од страна на граѓаните и таа доверба не смее да ја изгуби со тоа што ќе води дволични лицемерни политики, туку стабилни политики, политики коишто се предвидливи и политики на долг рок. Апсолутно можам да ги уверам граѓаните дека и сега сегашниот закон овозможува за одредени професии да имаат пролонгирано заминување во пензија. Немаме намера да ги зголемуваме старосните граници, немаме намера да ги зголемуваме процентите со коишто ќе се зафаќа за придонесите здравствени и пензиски, немаме намера да го зголемуваме данокот на додадена вредност, немаме намера да интервенираме во успешната приказна наречена рамна даночна политика – заклучи тој.