Образовните асистени не може трајно да бидат вработени, како што бараат родителите на децата со атипичен развој, бидејќи потребите во училиштата се менуваат, вели министерката за образование и наука, Весна Јаневска во интервју за Радио Слободна Европа

Ако во иднина се појави можност за такво нешто, мнистерката вели дека со задоволство ќе го прифати, но сега нема да дава лажна надеж.

-Мојата порака до родителите е да бидат мирни. Министерството, кое е надлежно за ресурсните центри кои што ги објавуваат конкурсите за образовни асистенти, комуницира, е во контакт и врши одреден надзор. Но, сепак, родителите треба да знаат дека најпрво училиштата пријавуваат колку образовни асистенти им се потребни. За тоа треба време, прво да се запишат децата, па училиштата да утврдат колку деца имаат со посебни образовни потреби за да можат да пријават до ресурсниот центар. Образовните асистенти не се трајно вработени. Причината е што потребите за нив секоја година се менуваат. Ако се зголемат потребите, ние го зголемуваме бројот на асистенти, објаснува Јаневска.

Таа вели дека околу стотина училишта немаат деца и веќе се со клуч на вратата, па на градоначалниците им се препорачува да ги пренаменат објектите – за старски дом или некаков клуб.

Во врска со резултатите од ПИСА тестирањата, Јаневска најмала грешка гледа во наставниците, а поголем притисок и предизвик, како што нагласува, наоѓа кај родителите и целото општество. Според неа, резултатите од ПИСА јасно ги лоцираат проблемите.

-Ќе почнам од најдалечните проблеми – тоа што несериозно се сфаќаше ПИСА тестирањето, и меѓу наставниците и меѓу учениците не беше јасно дека ПИСА тестирањето ја претставува државата. Друго, учениците, бидејќи знаеја дека тоа не е за оценка, многу лежерно се однесуваа кон ПИСА тестирањето. Трето, има грешки во преводите на ПИСА тестирањето, барем така ми кажуваат стручни лица, и тој превод ќе треба добро да се провери и да се направи посоодветен. Четврто, наставниците треба да знаат на што треба да обрнат внимание и ние тоа го работиме. Бирото за развој на образованието веќе работи со наставниците за да им посочи на што треба да обрнат внимание, кога децата се подготвуваат за животот – не за ПИСА тестирањето, вели министерката.

Јаневска најави дека во овој мандат ќе биде завршена доградбата на објектите на ФЕИТ и факултетот за физичка култура. Рече дека овие објекти биле намерно оставени 10 години, бидејќи се почнати како проект на ВМРО-ДПМНЕ и обвини дека не се размислувало дека тие се во корист на студентите, професорите и знаењето.

„Ќе се почне со едната, па потоа ќе се продолжиме со другата“ порача Јаневска.