Анимозитетот кон ДУИ се поврзува со клиентелизмoт и корупцијата, а не со некаква општа албанофобија и ксенофобија. Пресилно е да се каже дека против Али Ахмети и ДУИ се води нацистичка кампања. Политичарите треба да ги избираат зборовите, бидејќи и со поблага реторика може да ја постигнат целта и треба да се воздржуваат од употреба „забранети“ термини, реагираат политички аналитичари на констатацијата на лидерот на интегративците дека против нив се води црна и нацистичка кампања, откако високи функционери од партијата, но и роднини на Ахмети, се на тапет за неколку случаи.

– Точно е дека во последно време се појавува еден анимозитет на етничките Македонци кон етничките Албанци, кој е поттикнат од долгорочната системска политичка криза. Но, ние засега не можеме да направиме знак на еднаквост дали тој анимозитет е кон ДУИ или кон Албанците воопшто, бидејќи, во моментов, претставник во Владата е ДУИ и анимозитетот и наративите што се појавуваат се поврзани со клиентелизам и корупција, а не со некаква општа албанофобија и ксенофобија. Не сум сигурен дека може да се направи целосен знак на равенство дека некаков евентуален анимозитет кон ДУИ е еднаков на анимозитет кон сите Албанци, но секако постои ризик од наплив на популизам и национализам и, главно, незадоволство кај етничките Македонци тоа да се прелее во општа албанофобија. Се разбира, на Ахмети му одговара да претстави дека нападот кон ДУИ е напад кон сите Албанци, тоа му е политички опортуно – вели за „Слободен печат“ аналитичарот Петар Арсовски.

Ахмети ги повикува институциите да влезат во фирмите на неговите роднини

Тој заклучува дека пресилна е формулацијата „нацизам“, употребена од лидерот на ДУИ, бидејќи нацистичката идеологија не е само ксенофобија, туку внатре има елементи на расизам, на национализација на економијата, а во секој случај не може да се каже дека некој води нацистичка кампања против него и ДУИ.

Ахмети во интервју за ТВ21 за бизнисите на синот и на внуците вели дека против него и против ДУИ се води црна кампања, бидејќи пристапот бил нихилистички и нацистички, со повици дека ДУИ албанското прашање го придвижила напред во големи размери и дека ја присвојува државата, и економијата. Тој не откри кој стои зад „нацистичката“ кампања, но вели дека располага со непобитни факти. Во интервјуто, Ахмети обелодени дека во петокот Управата за јавни приходи влегла во компанијата на неговиот син.

– Еве, конкретно, вчера УЈП влезе во целосна контрола во компанијата на мојот син. Тоа е во ред. Нека проверат сè што имаат и истовремено ги повикувам од УЈП, финансиската полиција, Јавното обвинителство, сите нека проверат сè што е спорно со компаниите на моите роднини – вели Ахмети.

Лидерот на ДУИ додава дека неговото семејство се соочува со сериозни напади и закани во последните години.

– Станува збор за добро смислена кампања против мене лично и против Демократската унија за интеграција. Дури можам да кажам дека се работи за нацистичка кампања, затоа што сметаат дека ДУИ и Албанците ќе им ја земат државата и економијата – рече Ахмети.

Претходно, министрите Бујар Османи, Артан Груби и Крешник Бектеши обвинија дека група македонски бизнисмени „синхронизирано работат против интересите на Албанците во Македонија“.

– Петмина олигарси креирале економско-политички центар против ДУИ, олигарси кои преку приватизацијата стекнаа огромно богатство – изјави неодамна Груби.

Тој смета дека на тие луѓе им пречи моќта на ДУИ, а со тоа и економската и политичката моќ што ја добиваат Албанците во Македонија.

Кордалов: Постојат термини што се „забранети“ за употреба

Комуникологот Бојан Кордалов смета дека независно дали сте на власт, или не и колку долго сте на власт, постојат термини во светски рамки што се „забранети“ за употреба.

– Еден од нив е фашизмот, нацизмот поради тоа што се асоцира со една епоха во којашто страдале многу луѓе од таков режим, што бил многу нехуман и однел многу човечки животи и загрозувал многу групи. Многу е важно да се користат одбрани зборови, бидејќи и со многу внимателно одбрани зборови се постигнува поентата – вели Кордалов за „Слободен печат“.

Изјавата на Ахмети предизвика и жестоки реакции на социјалните мрежи од професори и аналитичари.
Според професорката Мирјана Најчевска, „мафијашот се обидува да ни ги замачка очите со бомбастични изјави“.

– Не, Али, не се води против тебе и твојата мафија нацистичка кампања, туку ние граѓаните се обидуваме да се спасиме од инсталираната криминална банда во државата. И не верувам во функционирањето на ниту една институција во која има макар еден член на мафијата регистрирана како политичка партија – напиша Најчевска.