Фудбалскиот сојуз на Србија (ФСС) официјално потврди дека за квалификацискиот натпревар меѓу Србија и Албанија, кој ќе се одигра на 11 октомври на стадионот „Дубочица“ во Лесковац, нема да има билети во слободна продажба.

Присуството на трибините ќе биде овозможено исклучиво преку дистрибуција на билети во рамки на фудбалската заедница. Влезници ќе бидат доделени на регионалните сојузи, клубовите, фудбалските школи, фудбалски организации, официјални спонзори и гости на ФСС, акредитирани новинари, како и медицински и технички тимови неопходни за реализација на натпреварот.

„Влезот на стадионот ќе биде дозволен само со строго персонализирани билети и задолжителна проверка на лична документација (лична карта или пасош), како и ригорозни безбедносни проверки на влезовите, целосно во согласност со највисоките безбедносни стандарди“, стои во соопштението на ФСС.

Одлуката е донесена во координација со ФИФА, УЕФА и Министерството за внатрешни работи на Србија, поради тоа што натпреварот е оценет како настан со највисок безбедносен ризик.

Преземено од: Спорт.ком.мк