Поранешниот НБА кошаркар Павел Подколжин испиша фудбалска историја, откако го запиша својот прв настап за Амкал во рамките на Купот на Русија, со што стана највисокиот фудбалер кој некогаш заиграл на професионален фудбалски натпревар.

Подколжин, кој со своите 226 сантиметри доминираше под обрачите во кошарката, се префрли на фудбалскиот терен неколку години по завршувањето на спортската кариера. Тој професионално се збогуваше со кошарката во 2019 година, а јавноста најмногу го памети по кратката авантура во НБА-лигата, каде во периодот од 2004 до 2006 година беше дел од Далас маверикс, за кои запиша шест настапи.

Во кариерата во фудбалот, Подколжин го облече дресот на Амкал и застана на теренот како стартер во мечот против Калуга, што му донесе уникатен рекорд во светот на фудбалот, највисок фудбалер што настапил на официјален натпревар.