Дванаесет големи кафеави мечки во Националниот парк и резерват Катмаи во Алјаска се бореа за титулата на „Недела на дебелите мечки“, а оваа година победи мажјакот Чанк, пренесува Си-ен-ен.

Ова диво животно, кое го користи летото за да се здебели и да ја преживее зимата, излезе „од калта кон ѕвездите“, бидејќи поради повреда на вилицата не можеше да лови лосос некое време, што е омилена храна на мечките во Алјаска.

Покрај забавата околу изборот на „најдебелиот шампион“, „Неделата на дебелите мечки“ има и едукативна цел – да ги доближи луѓето до животот на кафеавите мечки и нивното живеалиште во Алјаска.

Натпреварот, кој се одржува од 2014 година, се фокусира и на работата на чуварите во Катмаи, четвртиот најголем национален парк во САД.

За да ги преживеат суровите зими во Алјаска, кафеавите мечки поминуваат месеци хибернирајќи во своите дувла. Колку повеќе килограми акумулираат пред тоа, толку се поголеми нивните шанси за преживување. Ова е особено важно за бремените женки, кои влегуваат во своите дувла порано од другите.

Како што пишува на веб-страницата на паркот: „Дебелите мечки се успешни мечки“ – па може да се каже дека сите мечки Катмаи се всушност победници.

Чанк сега ќе ја има својата фотографија во „Салата на славните“ на „Неделата на дебелите мечки“, каде што се оддава почит на сите претходни шампиони.