Одлуката на британската влада да ја стави Турција на црвена листа поради пандемијата на коронавирусот, може да донесе огромни проблеми на спортските настани кои треба да се одржат во оваа земја.
На црвената листа на Велика Британија се наоѓаат државите во кои е ризично да се патува ви време на пандемија на коронавирусот. Овој потег на Владата го донесе во прашање одржувањето на финалето во Лигата на шампионите кое треба да се игра на 29 мај во Истанбул, а во кое ќе се сретнат Манчестер сити и Челси. Многумина сметаат дека одлуката на Владата е да изврши притисок врз УЕФА за да го премести финалето во Лондон. 

Но, освен финалето во ЛШ, поради одлуката на британската влада исто така виси и формула 1 трката за Големата награда на Турција која е закажана за викендот од 11 до 13 јуни. Иако има повеќе од еден месец и доволно време да се подобри епидемиолошката слика во Турција, челниците на Формула 1 ќе мораат кон крајот на мај да донесат конечна одлука, дали ќе се одреди нов термин или ќе се замени со некоја друга трка.