Граѓанската активистка Ана Глигорова како претставник на 15 000 членови на неформална група за он-лајн настава, откако не беше примена од страна на министерката за образование Мила Царовска пред новинарите ги кажа ставовите на групата која е против владината одлука учениците од први септември да стартуваат на училиште со физичко присуство.

Според Глигорова со одржувањето на настава со физичко присуство нема да има можност децата да одржуваат дистанца.  

 „Правото на живот и правото на здравје е неприкосновено. Загарантирано е со Уставот, со Универзалната декларација за човекови права. Според последната одлука на Владата донесена на 17 август, децата треба да започнат настава со физичко присуство од 1 септември. Но, со оглед на тоа што ни доаѓа цунами, имаме секој ден по 30 починати, огромен број на заболени, меѓу нив и млади луѓе кои добиваат тешка клиничка слика, сметаме дека оваа учебна година треба да биде со он-лајн настава по секоја цена – истакна Глигорова на денешната прес конференција.

Министерката за образование и наука Мила Царовска претходно соопшти дека училиштата се подготвени за старт на учебната година на 1 септември со физичко присуство, а тие перманентно ќе ја следат ситуацијата со коронавирусот во земјата. 

Одговарајќи на новинарско прашање во врска со ставовите на две здруженија од кои едни бараат онлајн настава и право на избор на секој родител, а други настава со физичко присуство, Царовска рече дека ги почитува сите мислења, но дека ќе се спроведе владината одлука за почеток на наставата со физичко присуство.

Царовска: Училиштата се подготвени за настава со физичко присуство