Туристичкиот бисер Охрид се повеќе се бетонизира, а згради никнуваат на секој чекор. Очигледно е дека до градежниците не допираат препораките од УНЕСКО и тој веќе две години не излегува од нивниот фокус. Најновото статистичко истражување за април покажа дека овој град по Скопје е водечки по издадените градежни дозволи – дури 232 нови станови ќе се градат или веќе се во изградба. Охрид е познат и по уште една неславна статистика, која обелодени дека тој по Скопје е втор на листата со празни станови. Според таа статистика, во 2022 година во градот имало дури 17.820 станови во кои не живеел никој, додека во соседна Струга, таа бројка била нешто помала и изнесувала 10.153. Некои од становите се испразнети поради иселување, а други, пак, се купуваат како инвестиција, а трети се во сопственост на сезонските станари на Охридската ривиера, кои ги посетуваат од мај до септември.

Од Општина Охрид неодамна посочија дека засилената урбанизација го наметнува и најголемиот проблем – обезбедување на пристапни патишта до објектите. Локалните власти најавија дека во иднина ќе бараат начин за зголемување на комуналиите за уредување на градежно земјиште или неиздавање на градежни одобренија онаму каде нема економска исплатливост.

Инаку, цената на новоизградените станови и станбените објекти во градба долж крајбрежјето и во центарот на Охрид достигна рекордни 4.000 евра за метар квадратен. Во новоградбите во централното градско подрачје, како најатрактивни локации, метар квадратен станбен простор моментално може да се купи и по цена од 1.500 до 3.000 евра. Во останатите делови на Охрид, како Охридати, Билјанини Извори, Бејбунар, кај меѓуградската автобуска станица, урбаните заедници Лескајца, Воска и 7 Ноември, цените се нешто пониски и се движат од 1.200 до 1.500 евра за метар квадратен станбена површина.

Становите кои се продаваат во постарите објекти, зависно од локацијата и нивната состојбата во која се наоѓаат, можат да се најдат од 1.000 евра па нагоре.
Според искуството и анализите на Агенциите за недвижности, побарувачката на станови во Охрид далеку ја надминува понудата, што секако се рефлектира на пораст на цените. Дел од агентите за недвижности од Охрид за „Слободен печат“ велат дека од пред три години до денес, цената за квадрат е двојно зголемена.