Измама е информацијата која се шири како спонзорирана објава на социјалните мрежи, дека Македонски пошти доделуваат илјада Ајфони 11 про, бесплатно. Директорот на Македонски пошти, Ејуп Рустеми, за „Слободен печат“ вели дека објавата претставена како наградна игра е всушност вирус и апелира граѓаните да не наседнуваат на измамата.

– Тоа е лажна наградна игра, не е од Македонски пошти. Некој вирус е. Вчера нашиот тим од ИТ секторот во Пошти се обиде да го пријави ова официјално до Фејсбук, направивме се што можеме. Ова не е наша игра, туку измама, ни рече Рустеми.

За да биде поуверлива измамата, некој креирал фан страница на која е злоупотребено и логото и името на Македонска пошта, а потоа пуштил и реклама дека се организира наградна игра од оваа институција.