Патничкиот авион на Азербејџан ерлајнс се урнал под сомнителни околности, а сè повеќе докази укажуваат на тоа дека авионот по грешка бил погоден од руски ракетен систем за воздушна одбрана. 38 лица загинале во несреќата, додека 29 патници преживеале.

Според првичните информации, авионот Embraer E190AR најверојатно бил погрешно идентификуван како украинско беспилотно летало и погоден од ракета Панцир-С1. Делови од остатоците од авионот, особено задниот дел на трупот, кои останале недопрени, покажале траги од шрапнели, кои се совпаднале со експлозија во близина на авионот. Преживеаните патници исто така сведочеле за експлозијата надвор од авионот.

За време на експлозијата, авионот се обидувал да слета во Грозни, главниот град на Чеченија, кој неодамна бил цел на чести украински напади со беспилотни летала. Силите лојални на чеченскиот лидер Рамзан Кадиров се верува дека испалиле ракета кон авионот.

Последните зборови на пилотот

Според делумно објавениот транскрипт од комуникацијата помеѓу пилотот и контролата на воздушниот сообраќај, екипажот првично претпоставил дека имало судир со јато птици. Додека се бореле да го контролираат авионот со 67 луѓе во авионот, тие побарале помош во три различни земји – Русија, Азербејџан и Казахстан.

Во 8:12 часот, екипажот го пријавил губењето на двата ГПС системи, по што побарале навигација за да се вратат на аеродромот во Баку, од каде што полетале. Аеродромот, во меѓувреме, беше затворен поради закани со беспилотни летала.

Во 8:16 часот, пилотот пријавил дефект: “Имаме грешка во контролата, птица се удри во пилотската кабина. Ударот на птица во пилотската кабина (неразбирливо)…”. Во 8:17 часот, тој најавил промена на курсот на аеродромот во јужна Русија, но потоа изјавил дека не може да го изведе маневарот бидејќи контролата над авионот била изгубена.

Во 8:19 еден од пилотите вели: “Не можам да издржам 150, имаме висок притисок во кабината”.

Една минута подоцна, во 8:20 часот, пилотот вели: “Мојот авион ја губи контролата”.