Приватна компанија за кредити ја тужи Лиза Мари Присли за 3,8 милиони долари, бидејќи починатата пејачка, наводно, не отплатила кредит од 2018 година.

Според судските документи, објавени на „Ентертејмент тунајт“, од компанијата „Naussany Investments & Private Lending“ тврдат дека Присли имала рок до мај 2022 година целосно да го отплати кредитот кој го подигнала кај нив. Тие тврдат дека немале никаков контакт со Присли, која почина во јануари годинава, и покрај тоа што, наводно, тие направиле неколку обиди да го наплатат долгот.

Според судските документи, Присли го дала својот сопственички удел во „Елвис Присли Ентерпрајзс“ и имотот Грејсленд како колатерал.

Сепак, нејасно е зошто го подигнала кредитот. Од компанијата тврдат дека Присли и претходно позајмувала пари од нив – позајмила 450.000 долари во јули 2016 година, кои ги вратила во целост следниот месец. Од компанијата соопштија дека ќе се откажат од случајот ако имотот на Присли, сега контролиран од нејзината ќерка Рајли Кио, се согласи да плати 2,85 милиони долари, или 75 отсто од вкупниот долг, во рок од 45 дена.

Инаку, ѕвездата од „Daisy Jones & the Six“ беше прогласена за единствен управител со имотот на нејзината покојна мајка, по правната битка со нејзината баба Присила Присли. Оваа 34-годишна актерка стана сопственик и на Грејсленд, легендарниот имот во Мемфис, кој некогаш му припаѓал на нејзиниот дедо Елвис Присли.

Покрај тоа, Кио сега е одговорна и за нејзините 14-годишни полусестри, Харпер и Финли.

Што се однесува до Присила Присли, таа ќе биде специјален советник на фондацијата во иднина. Исто така, ѝ беше дозволено да биде погребана до нејзиниот покоен сопруг, и покрај тоа што нејзиното првобитно барање беше одбиено. За да се постигне спогодба, Кио, наводно, ѝ платила повеќе од 1 милион долари на нејзината баба за да го решат нивниот правен спор во јуни годинава.

Како потсетување, драмата меѓу бабата и внуката започна веднаш по смртта на Лиза Мари, кога Присила ја оспори „автентичноста и валидноста“ на тестаментот на нејзината покојна ќерка.

Имот вреден 500 милиони долари: Познат е наследникот на Грејсленд по смртта на Лиза Мари Присли