Жените изложени на некои многу често користени хемикалии имаат многу поголеми шанси да добијат рак на јајниците или меланом и некои други видови на рак, според истражувањето спонзорирано од американската влада, пишува „Гардијан“ (The Guardian).

Користејќи ги податоците собрани од Центрите за контрола и превенција на болести (ЦДЦ), тим истражувачи пронашле докази дека жените на кои им бил дијагностициран рак поврзан со хормоните биле изложени на одредени пер- и полифлуороалкилни супстанции (PFAS), кои се користат во илјадници домаќинства и многу индустриски производи.

ПФАС (PFAS) се нарекуваат и „вечни хемикалии“ затоа што не се распаѓаат во природата. Тие открија слична врска помеѓу жените заболени од рак и високата изложеност на феноли, хемикалии што се користат во пакувањето на храната, боите и производите за лична хигиена.

Студијата беше објавена во списанието „Journal of Exposure Science and Environmental Epidemiology“, а научниците нагласија дека не е пронајдена слична врска помеѓу хемикалиите и ракот кај мажите.

Хемикалиите ПФАС можат да ги нарушат функциите на одредени хормони кои ги имаат само жените, потенцијален механизам кој ја зголемува можноста за развој на рак поврзан со хормони. Хормонално активните карциноми се вообичаени и тешко се лекуваат, па затоа е критично понатамошното истражување за оваа врска, велат истражувачите.

– Луѓето треба да се грижат за ова бидејќи знаеме дека има голема изложеност на овие хемикалии и имаме податоци за тоа. Овие хемикалии можат да го зголемат ризикот од разни здравствени проблеми и да ги променат биолошките патишта. Ова е важно да се знае за подобро да се спречи изложеноста и да се намали ризикот – изјави за „Гардијан“ Макс Аунг, професор на Медицинскиот факултет Кек на Универзитетот во Јужна Калифорнија.

Речиси е невозможно да се избегне изложување на хемикалии ПФАС бидејќи тие се толку распространети и се нарекуваат „вечни хемикалии“ затоа што не се разградуваат природно и опстојуваат во водата, почвата, воздухот и храната. Се проценува дека дури 97 отсто од Американците имаат ПФАС во крвта, според податоците на ЦДЦ. Геолошките истражувања покажаа дека 45 отсто од водата за пиење е исто така загадена со овие хемикалии.

Истражувањата покажаа дека жените изложени на ПФАС имаат двојно поголем ризик од развој на меланом, а откриена е и врска помеѓу ПФАС и рак на матката. Постојат различни видови на ПФАС и тие веќе се поврзани со некои здравствени проблеми.