Конечно е откриено зошто косата побелува како што старееме. Виновни се, сметаат американските научници, клетките кои создаваат пигменти и кои со текот на времето ја губат способноста да созреваат, пишува „Би-би-си“.

Ова прекинато созревање влијае на незрелите клетки кои инаку би се развиле во меланоцити кои на косата ѝ ја даваат природната боја.

Тим научници од Универзитетот во Њујорк (NYU) го проучувале овој процес кај глувци кои имаат исти такви клетки и кои ја одредуваат бојата на влакното.

Овој труд би можел да биде почеток на запирање на процесот на побелување. Но не само тоа. Според Британското здружение на дерматолози (БАД), работата на меланоцитите може да ни помогне и подобро да разбереме зошто се појавуваат одредени видови на рак и други медицински состојби.

Косата постојано расте и опаѓа, а тоа е нормален циклус кој се случува во текот на животот.

Нова коса расте од фоликулите на косата, кои се наоѓаат во кожата, каде што се наоѓаат и меланоцитите кои произведуваат пигмент.

Меланоцитите исто така постојано пропаѓаат и се обновуваат. Новите се создаваат од матичните клетки, а истражувачите веруваат дека кај луѓето на кои косата им побелела, овие клетки на некој начин „заглавиле“.

Тимот на „NYU Langone Health“ користел специјални скенирања и лабораториски техники за да го проучува процесот на стареење на клетките.

Како што старее косата, таа опаѓа и повторно расте, а со текот на времето, сè поголем број на матични клетки од меланоцити почнува сè побавно да ја врши својата работа.

Матичните клетки престануваат да циркулираат околу фоликулот и стануваат фиксирани, поради што не можат да созреат во вистински меланоцити. Ако нема создавање на пигмент, косата станува сива, бела или сребрена.

„Нашата студија ни помогна подобро да разбереме како матичните клетки на меланоцитите влијаат на бојата на косата. Многу е веројатно дека истата фиксна положба на матичните клетки на меланоцитите се појавува и кај луѓето. Ако е така, ова претставува потенцијален пат по кој треба да се оди за да се поништи или спречи побелувањето“, рекол водачот на студијата, д-р Ки Сан.

Ова не е првпат научниците да сугерираат дека побелувањето на косата може да биде делумно реверзибилен процес.

Лошата исхрана е една од можните причини за предвремено побелување што може да се излекува.

Некои истражувачи, исто така, тврдат дека стресот може да придонесе човечката коса да побелее и сугерираат дека отстранувањето на стресот може – барем за некое време – да го врати процесот на пигментација.

Други истражувања сугерираат дека генетиката, односно нашата ДНК, делумно одредува кога ќе побелеме.

Експертите советуваат да не се кубат побелените влакна, бидејќи тоа нема да спречи следното влакно што расте од истиот фоликул да биде сива. А ако го оштетите фоликулот на косата, новите влакна потешко ќе растат, што значи дека на крајот може да завршите со помалку коса или дури и целосно без влакна.

Доктор Лејла Асфур од Британското здружение на дерматолози рекла дека боењето на косата е голем бизнис со големи пари: „Се предвидува дека глобалниот пазар на бои за коса ќе достигне вредност од 33,7 милијарди долари до 2030 година. Очигледно е дека има голема побарувачка. Кога станува збор за пошироката популација, очигледната импликација на ова истражување е дека сме чекор поблиску до изнаоѓање начин на белите влакна повторно да им ја вратиме природната боја.“

„Но, резултатите од оваа студија, исто така, им помагаат на лекарите подобро да разберат некои други состојби во кои овие матични клетки може да играат улога. На пример, ќе можеме подобро да ја разбереме основната природа на најсмртоносниот рак на кожата, меланомот“.

Ова истражување може да помогне и кај медицинската состојба наречена алопеција ареата, каде што имунолошкиот систем ја напаѓа косата и предизвикува нејзино опаѓање. Понекогаш кај таквите пациенти косата повторно расте, но побелува, објаснила таа.

Освен тоа, истражувањето би можело да донесе и некои нови сознанија за витилиго – состојба каде што се појавуваат бели дамки на кожата. Научниците се обиделе хируршки да ги постават фоликулите на косата во погодените области за да помогнат во обновувањето на бојата од пигментот што се наоѓа во фоликулот на косата. Но, тоа сепак бара повеќе истражувања, вели д-р Асфур.