Морињата и океаните навистина се преполни со необични суштества. Но, научниците особено се воодушевени од едно мистериозно суштество, за кое велат дека е бесмртно, бидејќи е способно постојано да се регенерира, пишува „Њусвик“.

Во студијата која е објавена во „Cell Reports“, научниците ова суштество го идентификуваат под името „Hydractinia symbiolongicarpus“, мал безрбетник кој живее на лушпи од ракови.

„Студиите како оваа, кои ја истражуваат биологијата на необичните организми, откриваат колку се универзални биолошките процеси и колку сè уште ни треба да ги разбереме нивните функции, односи и еволуција. Таквите откритија имаат голем потенцијал да дадат нови сознанија за човечката биологија“, рекол Чарлс Ротими, коавтор на студијата.

Научниците, знаат дека овој безрбетник е посебен, поради матичните клетки што ги користи за регенерирање на ткивото. Тие велат дека се способни да се трансформираат во било кој тип на телесни клетки, што ги прави способни да го стимулираат растот на нови делови од нивното тело. Луѓето можат да ги користат овие клетки само во текот на првата фаза од развојот, додека ова суштество може да го прави тоа во текот целиот свој живот.

Во своите истражувања, научниците откриле дека ова суштество ги складира своите матични клетки во долната половина од своето тело, но кога му ја отсекле устата, од неа израснало сосема ново тело, што покажува дека животното можело да генерира нови матични клетки. За да истражат како се активираат овие матични клетки, авторите опишуваат во трудот како го скенирале геномот поврзан со стареењето.

Тие откриле дека од трите гени на „Hydractinia symbiolongicarpus“, поврзани со стареењето, еден е „вклучен“ во клетките во близина на местото на сечењето на устата. Кога овој ген бил избришан од геномот, животното не можело да се регенерира.
Ова е спротивно од ефектот што стареењето го има врз многу други животни, како и луѓето. Клетките кои стареат кај повозрасните луѓе, најчесто предизвикуваат воспалителни процеси и го забрзуваат стареењето на клетките околу нив.

„Од организмите како „Hydractinia“, можеме да научиме како стареењето може да биде корисно и да го прошириме нашето разбирање за стареењето и лекувањето“, додал Енди Баксеванис, коавтор на студијата.

Инаку, досега, научниците открија способност за регенерација кај 35 видови животни. Некои животни се дури и целосно имуни на стареењето, како што се хидрата и „бесмртната медуза“.