Откако државниот обвинител Мохамед Џафар Монтазери во саботата дека „моралната полиција“ веќе е укината, државните медиуми објавија дека „Гашт-е ершад“ не се под надлежност на обвинителот, туку на Министерството за внатрешни работи, кое, пак, не го потврди укинувањето на озлогласената служба за јавен ред

Демонстрантите во Иран најавија тридневен национален штрајк за да го зголемат притисокот врз властите да ги либерализираат строгите мерки за изразување и однесување во јавност, наспроти конфликтните извештаи дека раководството во Техеран веќе ја укинало озлогласената „морална полиција“, чие брутално однесување разгоре тримесечни протести во кои загинаа 470 луѓе, вклучувајќи и 64 малолетници.

Од граѓаните е побарано да се воздржат од пазарење во следните три дена за да се спречи циркулација на пари во банкарскиот систем. Што е можно повеќе продавници, особено во економските центри како што се чаршиите во големите градови, треба да останат затворени до утре.

Хаосот го продлабочи изјавата на државниот обвинител Мохамед Џафар Монтазери во саботата дека „моралната полиција“ веќе е укината, под притисок од протестите. Државните медиуми објавија дека моралната полиција не под надлежност на обвинителот, туку на Министерството за внатрешни работи, кое, пак, не го потврди укинувањето на озлогласената служба за јавен ред. Пратеникот Незамодин Мусави по средбата со претседателот Ебрахим Раиси изјави дека „владата обрнува внимание на барањата на народот“, но ни тој не ја потврди веста за укинувањето на специјалните единици „Гашт-е ершад“, кои народот ги смета за одговорни за смртта на 22-годишната Махса Амини, при нејзиното приведување на улица во Техеран во септември зашто не била облечена согласно строгите стандарди.

Не е потврдена веродостојноста ни на изјавата на обвинителот Монтазери дека „властите ја разгледуваат можност и за укинување на законот жените задолжително да носат хиџаб на јавни места“.

Вашингтон оценува дека властите во Техеран, со обидите да се разбијат протестите, „самите се заробиле во нескршлив круг“, кој ги изолира и од меѓународната заедница и од сопствениот народ.

– Колку повеќе Иран врши репресии, толку повеќе ќе има санкции. Колку повеќе санкции, толку повеќе изолација. Колку повеќе изолација, толку повеќе тие ќе се вртат кон Русија. Колку повеќе се вртат кон Русија, толку повеќе санкции, полоша клима и помали шанси за нуклеарна дипломатија – оцени Роб Мали, специјалниот американски пратеник за Иран.