Десничарските демонстрации во Хаг, главниот град на Холандија, денес, неколку недели пред општите избори, се претворија во насилство и хаос, кога демонстрантите се судрија со полицијата и ја вандализираа канцеларијата на една политичка партија.
Полицијата употреби солзавец и водени топови за да ги растера демонстрантите кои фрлаа предмети кон полицајците и го запалија полициското возило.
Засега нема информации за повредени или апсења.

Холандските медиуми прикажаа како демонстрантите ја напаѓаат канцеларијата на центристичката политичка партија Д66.

Tuig. Je blijft van politieke partijen af.

Als je denkt dat je ons kan intimideren, dikke vette pech. Wij laten ons mooie land nooit afpakken door extremistische relschoppers. pic.twitter.com/vDDEwOtkWU

— Rob Jetten (@RobJetten) September 20, 2025

„Ѓубре, подалеку од политичките партии!“, рече лидерот на таа партија, Роб Јетен, и додаде во порака на платформата X:

„Ако мислите дека можете да нè заплашите, немате среќа. Никогаш нема да дозволиме екстремистичките демонстранти да ни ја земат нашата прекрасна земја.“

Помала група демонстранти се упати кон комплексот на Парламентот на Холандија, кој е ограден бидејќи е во реновирање веќе неколку години.

Насилството избувна на демонстрации од само неколку стотици луѓе, од кои многумина носеа црно, барајќи построга политика за давање азил на странци.

Општите избори беа распишани за 29 октомври откако антиисламскиот пратеник Герт Вилдерс ја повлече својата партија од владејачката коалиција во спор околу мерките за ограничување на странската имиграција.

Во денешното соопштение, Вилдерс ги осуди демонстрантите за блокирање на автопатот и напаѓање на полицијата, нарекувајќи ги „идиоти“ и „ѓубриња“.