Речиси две третини од готвачкиот кадар на хрватската ривиера се Македонци, а тие шефуваат и во ексклузивниот Дубровник, дознава „Слободен печат“ од нашинците што се веќе одомаќинети и посебно барани од тамошните сопственици на ресторани. Дел од нив се враќаат и по неколкупати, а од година во година со себе повлекуваат и други сезонски работници, создавајќи македонски тимови почнувајќи од помошни работници, па сè до келнери.

Според нашите сознанија, платата на главните готвачи се движи од 1.400 до 1.800 евра, но треба да се напомене дека овие примања се „резервирани“ за оние што се ангажирани во средно рангираните ресторани, додека во ексклузивните, платите се далеку повисоки. Помошниците готвачи може да заработат од 1.250 до 1.400 евра во зависност од тоа колку време работат. Ако, пак, се ангажирани во некои од угостителските објекти на Истарското приморје, платите се уште повисоки. Хрватските угостители во последните години главно имаат проблем со недостиг на работна сила, особено во летниот период од годината кога има најмногу работа во рестораните, хотелите и во кафеаните.

Хрватска од 2022-та законски го регулираше и ангажирањето сезонски работници, па тие се заштитени од евентуалните злоупотреби на хрватското приморје и се дополнително платени за прекувремените часови, за разлика од некои претходни искуства.

Бобан од Скопје, петта година по ред оди во Хрватска на сезонска работа, во Дубровник. По професија е готвач, работи во еден од рестораните во Стариот Град и ужива во својата работа. Во разговор за „Слободен печат“, Бобан вели дека неговиот ден почнува рано наутро, околу 8 часот. Неговата смена трае осум часа, а она што многу му се допаѓа е што „гостите не се заседнуваат по завршување на работното време на ресторанот“, како што е чест случај во Македонија.

– Ова ми е петта година по ред, како се враќам во Дубровник. Задоволен сум од условите – добивам два оброка, бесплатно сместување, пријавен сум со регулиран статус на престој и имам здравствено осигурување. Моите искуства со газдите се коректни, а откако одам на сезонска работа во Хрватска, сум донел барем десетина мои сограѓани, кои исто така се задоволни од условите и од платата – вели Бобан од Скопје, кој работи во Дубровник.

Готвачот Бобан за нашиот весник открива дека најмногу гости им се Американци, Англичани, Ирци, Германци, Французи, Португалци, Шпанци и Италијанци, а најмалубројни се гостите од Австралија, Канада, Бразил, како и Скандинавците. Во последните години им доаѓаат и организирани групи од Јапонија, Кореја, Кина. Главното мени, според македонскиот шеф, е медитеранската храна, а гостите се многу задоволни од подготвените оброци.

– Понекогаш оброкот не се подготвува во кујната, туку „сцената“ ја поставуваме пред гостите и тие сведочат за секоја фаза од подготовката. Ова е посебно задоволство и секогаш добиваме комплименти и подобар бакшиш од гостите. Тоа е голем плус и повеќе искуство. Навистина е посебно чувството кога ќе добиете директна пофалба од оние на кои им се допаѓа мојата храна – вели Бобан.

Како што вели, работата е потешка отколку во Скопје, но не чувствува притисок. Слободниот ден го користи за одмор и за плажа, а ќе остане до 1 ноември годинава.

Гостите во Дубровник плаќаат и по 90 евра за килограм свежа риба на жар

Хрватска не е за секој турист, односно таа се профилира како дестинација за висок туризам, а таков е особено Дубровник. Дел од нашинците брифираат дека една салата од октопод чини од 14 до 17 евра, додека порција тартар туна со крем од авокадо чини од 19,5 до 25 евра. Порција црни њоки со рагу од октопод се наплаќа од 17 до 19 евра, ладната далматинска даска чини од 27 до 35 евра. Има и голем избор на свежа морска риба на жар со цена од 91 евра за килограм. Точеното пиво е речиси 6 евра, чаша бело вино од 8 евра нагоре, чаша црвено вино од 10 евра нагоре, а ако сакате шише вино, тоа ќе ве чини од 25 до 90 евра.