Пред повеќе од 7.000 години, луѓето пловеле по Средоземното Море користејќи технолошки софистицирани чамци. Ова го покажа студијата со која беа истражени остатоците од кануа откриени во селото Ла Мармота, во близина на Рим.

Пет кануа направени од издлабено дрво – моноксил, датирани помеѓу 5700 и 5100 п.н.е., беа откриени за време на ископувањата на оваа локација, пишува „Псај.орг“.

Анализата на овие чамци покажува дека тие се направени од четири различни видови дрво, што е невообичаено за слични локации и имаат напредни градежни техники како што е арматурата.

Едното кану е поврзано со дрвен предмет во форма на буквата Т, со дупки, па можно е да се користело за затегнување на јажиња поврзани со едра или некои други наутички елементи

Ова, како и претходните експерименти за реконструкција, покажуваат дека кануата биле способни за многу работи. Дополнително тоа го потврдуваат и камените алатки од околните острови.

„Издлабените кануа во Ла Марморта се исклучителни примери на праисториски чамци и мореполовни системи. Нивната големина, како и другите елементи поврзани со нив, и разновидноста на употребеното дрво покажуваат дека ова место е значајно за секоја дискусија за неолитските кануа во Медитеранот и за потеклото на пловењето“, се наведува во студијата.

Сличностите помеѓу овие кануа и поновите морепловни технологии ја поддржуваат идејата дека биле направени многу големи достигнувања во пловењето за време на раниот неолит. Авторите сугерираат дека можеби има повеќе чамци зачувани во близина на Ла Мармота, потенцијална локација за идни истражувања.

„Директното датирање на неолитските кануа од Ла Мармота открива дека тие се најстари на Медитеранот, нудејќи непроценлив увид во неолитската навигација. Оваа студија ја открива неверојатната технолошка софистицираност на раните земјоделски и пасторални заедници, истакнувајќи ги нивните вештини за обработка на дрво и изградба на комплексни пловни објекти“, додаваат авторите.