На денешната седница на собраниската Комисија за европски прашања добија поддршка измените и дополнувањата на Кривичниот закон и Предлог-законот за вештачење и се проследуваат на понатамошна собраниска процедура.

Воведување нови кривични дела: родово базирано насилство, фемицид, полово вознемирување, а нападот на новинар или друг медиумски работник ќе се смета за напад на службено лице, за што е предвиден затвор до десет години. Ова се дел од измените на Кривичниот законик, кои во Комисијата за европски прашања добија осум амандмани – усогласени и изгласани од сите пратеници и прифатени од Министерството за правда.

Фемицидот, насилството против жените и девојчињата, половото вознемирување, силувањето од интимниот партнер, барањето сексуални услуги од носители на функции и други дела кои ја имаат како основа родовата припадност на жртвата, ќе бидат осудувани парично или со казна затвор од неколку години. Измените на Кривичниот законик беа договорени меѓу пратеничките од сите политички партии.

Од дневниот ред на денешната седница на Комисијата за европски прашања беше повлечен предлог-законот за изменување и дополнување на Законот за заштита на населението од заразни болести, со кој во случај на појава на заразна болест, се предлага забрана за влез во објекти за лица кои не се вакцинирани или немаат потврда за прележана болест. Министерството за здравство, исто така, ќе може преку примена на технолошки методи да спречи ширење на заразната болест.