Францускиот ракометен тим Нант го реши прашањето на позицијата десен бек за следната сезона откако денеска го официјализира потписот со поранешниот ракометар на Вардар, Хорхе Македа.

Шпанскиот репрезентативец денеска потпиша двегодишен договор со Нант и ќе биде наследникот на Кире Лазаров кој на крајот од сезоната си заминува од францускиот тим.

Ова за Македа значи враќање во Нант бидејќи од 2012 до 2015 година настапуваше за францускиот тим по што се пресели во Вардар со кого во 2017 година триумфира во Лигата на шампионите.

По заминувањето од Вардар, Македа потпиша за ПИК Сегед каде играше од 2018 до 2020 година, потоа се пресели во Веспрем од каде по завршување на сезоната си заминува и се враќа во Нант.

Македа ќе биде четврто засилување за францускиот тим кој веќе ги обезбеди потписите со Иван Пешиќ, Каулди Одриозола и Виктор Халгримсон.