Левица соопшти дека ВМРО-ДПМНЕ преку Еразмус делела европски пари на унивезритетот на Рамиз Мерко, иако се утврдени бројни неправилности во работењето на установата.

„Повторно се открива соработката помеѓу двете долгогодишни коалициони партнери, ДПМНЕ и ДУИ, овој пат преку директна соработка со градоначалникот на црна листа, Рамиз Мерко. Додека премиерот Мицкоски секојдневно го обвинува ДУИ за криминал и корупција, неговите директори делат европски пари на спорниот универзитет во Струга, кој е директно во сопственост на фунционерот на ДУИ и градоначалник на Струга.

Односно, новопоставената В.Д. директорка на Националната агенција за европски образовни програми и мобилност – Ана Михајлов, пред само една недела одобрила грант од Еразмус+ програмата на контроверзниот Универзитет во Струга од Рамиз Мерко! Ова е скандал од невиден размери, каде европски пари се делат на универзитет, за кој и министерката Весна Јаневска во официјални изјави потврди дека се утврдени бројни неправилности во неговото работење“ велат од партијата.

За Универзитетот на Мерко, како што велат, има бројни скандали и истиот е познат дека единствено служи за принтање дипломи на функционерите на ДУИ, без да исполнува никакви критериуми за неговата спорна акредитација.

Левица потсетува дека единствениот просветен инспектор кој алармираше за неправилностите на овој универзитет експресно беше суспендиран и деградиран, па пензиониран во време на владеењето на СДСМ и ДУИ. Оттаму ја потсетуваат ВМРО-ДПМНЕ дека просветен инспектор беше физички нападнат при вршење на надзор токму на струшкиот универзитет, каде сега се делат европски пари.