На локацијата на поранешното кафуле „Фонтана“ кај ТЦ Мавровка повторно има градежни активности. Четири месеци по уривање на дивоградбата за која се криеше криенка во јавноста чија е, односно кој стои зад неа, „растат столпчиња“, како што може да се види на фотографиите што ги објави „360степени“.

За разлика од спорните (бетонски и армирани) во ланскиот случај, за кој наголемо пишуваа медиумите, тековните што напредуваат во висина се налик на метални профили.

Извори од Општина Чаир за „360степени“ истакнале дека „сопственикот имал право, согласно првично поднесениот проект, на просторот да постави лесна конструкција“.

– Согласно законот за градење, согласно проектот, сопственикот има дозвола да гo врати објектот во првобитната состојба. Нема бетон, столбовите не се бетонски, тоа е лесна конструкција, е пораката од Општина Чаир.