Рано утрово, околу 2 и 30 новиот парламентарен состав го изгласа првиот Закон за реорганизација на државната управа од страна на новиот парламентарен состав. Законот беше донесен со 88 гласа „за“и 22 „против“ . Со овој закон се предвидува реорганизација на Владата. Сега наместо 16, Владата има 20 министерства. За законот гласаа пратениците на ВМРО-ДПМНЕ, ВЛЕН и ЗНАМ, но и ДУИ од Европскиот фронт, кои иако првично не го поддржаа, по средбата со претставници на ВМРО се премислија. Против законот гласаа пратениците на Алијансата за Албанците, кои се дел од Европскиот фронт.
Против гласаа пратениците на СДСМ и Левица, кои истакнаа дека се против тоа законот да се носи по скратена постапка, а нема податоци за финансиските импликации од истиот.

Сепак, ВМРО-ДПМНЕ потенцираше дека усвојувањето на законот овозможува рационализација и транспарентност на институциите.

Портпаролката на ВМРО-ДПМНЕ Марија Митева денеска на прес-конференција рече дека со изгласувањето на Законот за реорганизација на државната управа е направен првиот чекор кон комлетна ефикасност, рационализација и транспаретност на институциите во државата.

Според неа законските измени кои беа дел од изборното ветување, беа работени и со претставници на ЕУ и истиот е дел од ИПА програмата.

Митева: Законот за реорганизација на државната управа ќе допринесе рационализација на институциите

– Покажавме силен капацитет во собранието, покажавме дека ВМРО-ДПМНЕ умее да води конструктивен политички дијалог за обезбедување на 2/3 мнозинство низ предлози кои решаваат системски и важни прашања за нашите граѓани. За првпат по долги години, парламентарното мнозинство, предлага закон за структурни реформи, кој во својата суштина е развоен и трансформативен, со што не се остави простор за негово проблематизирање на ниту една партија која нема задни намери истиот да не го поддржи – додава таа.

Добро е што дел од ДУИ по прашањето за реорганизација на министерствата покажаа дека може да бидат конструктивна опозиција. По бојкотот на гласањето за Африм Гаши заедно со Левица, ова е мал чекор кон прифаќање на реалноста, велат од коалицијата ВЛЕН за тоа што утринава се случи во Собранието и поддршката од Европскиот фронт за реорганизација и зголемување на бројот на министерства од 16 на 20.

ВЛЕН изразува задоволство што нивните апели кај некои пратеници на ДУИ вродија со плод.

-Ниту една лична кариера не е поважна од сигурната иднина на Албанците во ЕУ. Новата организација на Владата ќе овозможи поголем степен на ефикасност во реализацијата на заедничките програмски цели, што е во интерес на сите граѓани на Северна Македонија, стои во соопштението на здружената коалиција која ќе биде дел од новата влада.

ВЛЕН ја поздрави конструктивноста на ДУИ за зголемување на бројот на министерства

Од Левица ја обвинија ВМРО-ДПМНЕ дека ја одбиле условната поддршка за законот за реорганизација на министерствата. Од таму велат дека потоа партијата која освои најмногу гласови на последните избори заминала кај стариот коалициски партнер ДУИ и се испазариле за поддршка.

„ДПМНЕ молкум ја одби условната поддршка на Левица за реорганизација на министерствата и обезбедување на дво-третинско мнозинство со воведување на една изборна единица и реши да седне на маса со нивниот стар коалиционен партнер ДУИ.

Левица: Пазарот меѓу ВМРО-ДПМНЕ и ДУИ помина успешно за реорганизација на државната управа

Донесувањето на законот го отвора патот на актуелниот претседател Христијан Мицкоски да ги забрза процедурите за формирање на Владата. Според најавите, се очекува формирање влада пред празникот Курбан Бајрам. Дотогаш, Мицкоски во Собранието мора да ја достави програмата и имињата на новиот владин состав.

Вчерашниот маратонскиот ден во Собранието беше исполнет со низа обвинувања и кавги од собраниската говорница.