Првиот и засега единствен роботски навигациски систем во светот кој овозможува хируршки зафати на ‘рбетниот столб и на ‘рбетниот мозок со неверојатна прецизност и сигурност, пристигна во земјава, соопшти Клиниката за трауматологија. Станува збор за системот „ExcelsiusGPS“, кој денеска беше претставен на државната клиника.

Тој комбинира навигација во реално време со роботска рака која на хирургот му овозможува точно и безбедно поставување на импланти и инструменти. Тоа значи минимална можност за грешка, побрзо заздравување, пократок престој во болница и значително намалување на болката кај пациентите, објасни полскиот клинички специјалист кој помага во спроведувањето на системот, д-р Кжиштоф Чезлак.

– Овој робот ќе ви нуди дополнителна сигурност покрај тоа што го нудат хирурзите. Прецизноста е неспоредлива. Имаме студии кои покажуваат дека ова не е само скратување на времето за операцијата, подобро е за пациентот, има помалку радијација, помала загуба на крв и по ниска стапка на инфекција, вели д-р Чезлак.

Директорот на клиниката за Трауматологија, д-р Игор Мерџановски вели дека воведувањето на првиот и единствен роботски навигациски систем во македонските болници би бил голем чекор напред за нашето здравство.

„Оваа технологија не само што им помага на лекарите да работат побрзо и попрецизно, туку и го подигнува нивото на нега кое го добиваат пациентите дома, наместо да лекуваат во странство“, вели тој.