Бројот на жртви од поплавите во една од најсиромашните провинции во Јужна Африка, Источен Кејп, се искачи на најмалку 78, а официјални лица изјавија дека спасувачките напори во првите часови по катастрофата биле „парализирани“ поради недостаток на ресурси. Претставници на покраинската влада не дадоа точен број на исчезнати лица, но рекоа дека спасувачките напори ќе продолжат во петок.

Спасувачките екипи денес поминаа трет ден работејќи низ урнатините и поплавните води за да пронајдат исчезнати лица и да извлечат тела откако обилните дождови предизвикаа излевање на реката од коритото. Најлошите поплави го погодија градот Мтата и околните области, однесувајќи ги жртвите заедно со делови од нивните домови и автомобили.

Премиерот на покраината Источен Кејп изјави дека поплавите ги погодиле луѓето додека спиеле. Водата била висока 3-4 метри, рече тој. Посочи дека локалните власти се борат да организираат ефикасна спасувачка операција бидејќи катастрофата се случила во, како што рече, регион со хронично недоволно ресурси.

Руралната покраина Источен Кејп во југоисточна Јужна Африка, дом на околу 7,2 милиони луѓе, имала само еден хеликоптер за спасување. Регионот нема специјализирани нуркачи или единици со кучиња, што значи дека морале да бидат повикани од друго место за да помогнат.

Поплавите ја погодија покраината откако екстремно студен фронт донесе обилни дождови, силни ветрови и снег во делови од источна и јужна Јужна Африка. Метеоролозите предупредија на штетни временски услови минатата недела.

Официјалните лица изјавија дека најмалку 127 училишта и 20 здравствени установи во Источен Кејп се оштетени, додека околу 1.000 луѓе се во засолништа откако нивните домови беа поплавени или однесени од водата. Критичната инфраструктура, вклучувајќи патишта и мостови, исто така беше сериозно оштетена.