Најмалку 20 високи ирански команданти, вклучувајќи го и началникот на воздухопловните сили на Иранската револуционерна гарда, Амир Али Хаџизаде, беа убиени во израелските напади денес, изјавија за Ројтерс два регионални извори.

Израелската армија потврди дека Али Хаџизаде е убиен преку ноќ во израелски воздушен напад врз Иран, објави „Тајмс оф Израел“.

Армијата вели дека Али Хаџизаде е убиен во подземниот команден центар каде што се подготвувал нападот врз Израел и дека командниот центар бил цел на воени авиони. Се нагласува дека Хаџизаде „јавно се заколнал на верност на идејата за уништување на Израел во неколку наврати во последните години и дека одиграл голема улога во формулирањето на планот за уништување на Израел“.

Меѓу убиените високи функционери се и командантите на единицата за беспилотни летала и единицата за воздушна одбрана на Иранскиот корпус на револуционерна гарда, според израелската војска.