Тајланд и Камбоџа денес разменија тежок артилериски оган, а досега во ескалацијата на пограничниот конфликт се убиени најмалку 16 луѓе.

Според тајландското Министерство за здравство, во судирите се повредени 46 лица, од кои 15 се војници.

Тајландската војска соопшти дека борбите започнале пред зори во провинциите Убон Рачатани и Сурин, и дека Камбоџа користела артилерија и ракетни системи БМ-21 од руско производство.

„Силите на Камбоџа вршеа континуирано бомбардирање користејќи тешко оружје, полева артилерија и ракетни системи БМ-21“, соопшти тајландската војска, додавајќи дека тајландските сили одговориле.

Судири меѓу Тајланд и Камбоџа се случија денес на 12 локации долж нивната спорна граница, потврди тајландски воен претставник, што укажува на проширување на конфликтот што избувна претходниот ден.