Поп-ѕвездата Тејлор Свифт ќе зачекори на сцената на годинашните Греми награди, каде што ќе има улога на презентер. Веста ја потврди Националната академија за запис на звукот и умтностите, која синоќа објави список со дел од личностите што ќе доделуваат награди.

Меѓу останатите презентери се Карди Би, Глорија Естефан, Оливија Родриго, Квин Латифа, СЗА, Викторија Моне, Вил Смит, како и членовите на „Ред хот чили пеперс“ – Ентони Кидис и Чад Смит. Викторија Моне минатата година ја освои наградата за Најдобар нов артист.

Свифт оваа година има шест номинации благодарение на нејзиниот албум „The Tortured Poets Department“, кој беше објавен во април 2024. Таа е во трка за Албум на годината и Најдобар поп-вокален албум, како и за Запис на годината, Песна на годината и Најдобро музичко видео за „Fortnight“ во соработка со Пост Мелоун. Покрај тоа, номинирана е и заедно со Грејси Абрамс во категоријата Најдобра поп-дуо/групна изведба за песната „Us“.

Досега, Свифт има освоено 14 Греми награди, а четири пати ја добила престижната награда за Албум на годината – повеќе од кој било друг артист.

Шоуто, кое повторно ќе го води Тревор Ноа, ќе вклучи настапи од Били Ајлиш, Чарли XCX и Шакира, како и од повеќето номинирани за Најдобар нов артист: Чапел Роан, Сабрина Карпентер, Дочи, Реј, Бенсон Бун и Теди Свимс.

Еден од најемотивните моменти на вечерта ќе биде специјалниот трибјут во чест на починатиот музички продуцент Квинси Џонс. Стиви Вондер и Жанел Моне ќе настапат во негова чест, заедно со Синтија Ериво, Херби Хенкок, Лејни Вилсон и други уметници кои сè уште не се објавени. Оваа музичка почит се подготвувала со месеци, изјави извршниот продуцент Раџ Капур за „Ролинг стоун“.

Настанот се одржува во време кога Јужна Калифорнија се соочува со катастрофални пожари. Академијата за снимки потврди дека церемонијата ќе се одвива според планот, но во малку изменет формат. Дополнително, некои од настаните во рамки на Греми неделата ќе бидат пренаменети за поддршка на жртвите од пожарите и нивните семејства.