Невремето и силниот ветер што викендов го зафати Битолскиот регион предизвика штети и во Националниот парк „Пелистер“.

Над стотина стебла молики, стари и по повеќе од 200 години се искршени од силниот ветер, за кој како што вели директорот на националниот парк „Пелистер“, Иванчо Тошевски, досега на ова место не бил запаметен ветер со такви силни удари.

Фотографиите ги објави Јане Ацевски, професор од Шумарскиот факултет во Скопје, кој вели дека скршено е и најстарото стебло на молика старо скоро 250 години и дека оваа е стара шума, која природно ќе изумре.

„Црвен трулеж плус ветер од 80 километри на час, уништена најстарата шума во Македонија“ напиша професорот Ацевски.

Директорот на националниот парк вели дека нема простор за паника, дека тоа е нормален процес и додава дека важна е поддршката на пошироката јавност за она што е потребно да се направи, а тоа е процесот на обновување на моликовата шума.